Artea elkarteak urteroko “txarriboda” egingo du zapatuan, ohitura hori berriz ere gogora ekartzeko asmoz. Ekitaldia eguerdian hasiko da eta txerrikia dastatzeko aukera egongo da
Gure arbasoentzat bezala, guretzat ere txerrikia eguneroko elikagaia da, ia etxe guztietan topatzen dena. Eskuratzeko modua aldatzen da, ostera: guk dendatik etxera ekartzen dugun bitartean, duela urte batzuk txerria hazi, hil, zatikatu eta betekiak egiteko ohitura bizi-bizirik zegoen Aiaraldeko baserrietan. Negu hasierako ohitura hori ez da guztiz desagertu, baina gutxi dira dagoeneko gure inguruan txarriboda etxean bertan egiten dutenak.
Artziniegako Artea Elkartea, ohitura hori gogora ekarri eta zabaltzeko asmoz, urtero lez txarriboda antolatu du museoan. Erakustaldi didaktikoa izango da, azalpenez lagundua, eta bertan prozesu ia guztia ikusteko aukera izango da; ikusiko es den bakarra txerria hiltzea izango da, hori leku egokitu batean egin behar da eta. Museoan animalia zatikatu egingo dute patioan, eta odolosteak eta txorizoak egingo dituzte sukaldean. Ekitaldi-aretoan ohitura honi buruzko bideo-emanaldia eskainiko dute bitartean. Ekitaldia eguerdian hasi eta 14:00etan amaituko da