Solarigrafia irudiak oso esposizio luzeekin hartzeko teknika bat da, eta horretan ibili dira Etxaurren Ikastolako 39 ikasle, Josu Zaldibar irakaslearekin. Proiektuaren emaitza Amurrioko kultur etxean ikusi ahal izango da abenduaren 12tik 11ra.
Argazkilaritza digitala eta puntako teknologia erabat nagusitu diren garai honetan, badira oraindik irudiak jasotzeko teknika ezberdin eta “garbiagoak”, eta aldi berean berritzaileak direnak. Solarigrafia horietako bat da. Izan ere, teknika honetan erabiltzen den bakarra da kamera estenopeiko bat (lenterik gabekoa) eta paper fotosentibera, eta ez dago prozesu kimikorik. Egiten dena da kamera leku jakin batean luzaroan utzi, oso esposizio luzea lortzeko, eta papera, berez, irudia hartzen joaten da. Beste modu batean esanda: egun, hilabete edo urte oso batean egindako argazkia da. Solarigrafia 2000. urte inguruan sortu zen Polonian, eta berehala piztu zuen, besteak beste, zeruko gorpuen mugimendua ikertu nahi zutenen interesa.
Josu Zaldibar argazkilariak duela urte bi urte izan zuen teknika honen berri eta berehala piztu zitzaion interesa eta Aiaraldean proiekturen bat egiteko adia. Hala, 2011n proiektu bat abiatu zuen Etxaurren Ikastolako 5. eta 6. mailako ikasleekin, solarigrafia zer den eta nola egiten den ikasteko eta aldi berean argazkilaritzan murgiltzeko. Tailer horretan 50 kamera inguru ipini dituzte, eta horren emaitza datorren eguaztenetik aurrera (hilak 12) Amurrioko Kultur Etxean ikusteko aukera izango da. Urtarrilaren 11ra bitartean zabalik egongo da erakusketa. Horretaz gain, Josu Zaldibarrek badu asmoa proiektua Euskal Herri osora zabaltzeko, beste 30 kamera ipinita.