Pasa den ostegunean “Munduko Jaiotzak” erakusketa zabaldu zen Santxotena tailer-museoan. Urtarrilaren 31ra bitartean egongo da ikusgai.
Gabonak hurreratzen ari diren honetan, azken urteotan bezalaxe, mundu osoko jaiotzen erakusketa heldu da Artziniegako Santxotena Museora. Teresa Lafraguaren zuzendaritzapean, aurten 900 jaiotza ikusi ahal izango dira bertan, aurreko beste urte guztietan baino gehiago (iaz, esaterako, 703 izan ziren). Esan bezala, kontinente guztietako artelanak izango dira ikusgai, herrialdeka banatuta. Espainiako Estatuko erkidego guztietako jaiotzak ere badaude.
Zuzendariaren arabera, erakusketaren asmoa da Gabonak “unibertsaltasun gisa” eta jaiotzak “sormenaren adierazpide eta kultur dibertsitatearen transmisio gisa” erakustea, eta artelanak dira bi kontzeptu horiek erakusteko bideak.
Erakusketa urtarrilaren 31ra arte egongo da zabalik, ostegunetik igandera, goizez 11:00etatik 13:00etara eta arratsaldez 16:00etatik 19:00etara. Ordutegitik kanpoko bisitak ere egin daitezke, baina horretarako aurretiaz erreserbatu beharra dago.