Bere bigarren urtea den honetan, Eusko Herriko Mendi Duatloi Zirkuituak proba bat egingo du Amurrion, zapatu honetan arratsaldeko 16:00etatik aurrera. Irteera eta helmuga kiroldegian jarriko dira, eta lasterketak hiru zati izango ditu, proba hauetan ohikoa den bezala. Lehenengo eta behin, 15:00etan, duatloi txikia egingo da Abiagako BMX pistan, alebin eta infantilentzat. Ondoren, 16:00etan, nagusien proba jokatuko da. Hasteko, kirolariek 6,5 km-ko ibilbide bat egin beharko dute menditik, korrika, kiroldegira itzuliz; jarraian, bizikleta hartu eta 16 km bete beharko dituzte Amurrioko basabideetatik barrena; amaitzeko, berriz zapatilak jantzi eta 3 km egin beharko dituzte berriz ere oinez. Proba bikoteka egiteko aukera dago, inskripzioa egitean hala adierazita.
Esan bezala, aurten bigarren urtez egiten ari da Euskal Herriko Mendi Duatloi Zirkuitua, baina Amurrioko proba, zehazki, lehenengo aldiz antolatu du Amurrioko Txirrindulari Elkarteak. Guztira 11 probak osatzen dute zirkuitua, eta Amurriokoaren ostean beste lau daude jokatzeke abendura bitartean: Amasan, Lizarran, Zallan eta Murgian.
Horretaz gainera, beste hitzordu ziklista bat ere egongo da asteburuan Amurrion, kasu honetan lehiarik gabekoa: XV. martxa zikloturista alforjekin. Hitzordua goizeko 10:00etan jarrita dago Juan de Urrutia plazan, Luiaondo, Orozko eta Lezama zeharkatuz 40 km egiteko. Orozkon, gainera, hamaiketakoa egingo dute eta museoa bisitatuko dute. Amaitzean, anaitasun-bazkaria egingo da. Izena emateko 40 euro ordaindu behar dira, hamaiketakoa eta bazkaria barne.