Mendizaleak goizeko 8etan abiatuko dira frontoitik, guztira 22 km egiteko Okondo mendietan zehar. Amaieran parrillada eta zozketak izango dira.
Okondoko Ganekogorta mendi-klubak gogotsu hasi du bere ibilbidea. Taldea urte honen hasieran sortu zen, herriko hainbat mendizale gazteren ekimenez, eta udagoien honetarako erronka potoloa hartu dute. Izan ere, hilabete honetan mendi eta naturari buruzko jardunaldiak egiten dabiltza, hainbat berbaldi, txango eta jarduerarekin. Horien artean, bihar egingo den mendi-ibilaldia neurtua dago. 21 km-ko ibilbidea prestatu dute horretarako, Okondo ibarra inguratzen duten mendi garaienak zeharkatuz: Pagolar (722 m), Idubaltza (691 m) eta Bikirrio (667 m). Mendizaleak goizeko 8etan abiatuko dira frontoitik eta 15:00ak arte 7 ordu dauzkate futbol-zelaiko helmugara iristeko. Ez da inolako sailkapenik egongo eta parte-hartzaile guztiek jatekoa eta edatekoa izango dute Otaolako anoa-postuan zein helmugan egingo den parrilladan. Dutxa-zerbitzua ere egongo da.
Izena emateko, federatuek 5 euro ordaindu beharko dituzte eta federatu bakoek, berriz, 8 euro. Internet bidez klubaren web-gunean egin daiteke zein zapatuan bertan frontoian. Informazio guztia http://www.ganekogorta.org helbidean kontsultatu dezakezue.
Baina Okondokoa ez da izango Aiaraldean mendiarekin izango den hitzordu bakarra. Izan ere, domekan, Aiarako Garobel mendizale-taldekoek txango bat egingo dute Lantenoko Idubaltza mendira. Kasu horretan 9:00etan geratu dira Arespalditzan hasierara kotxez joateko.