Gaur 21:00etan Artziniegako Txirrindularitza Elkarteko kideen pregoiak zabalduko du jaietako txanpa. Diru-murrizketak gorabehera, aurreko urteetako ekitaldi gehienak mantendu dira.
Irailarekin batera hemen ditugu berriz ere Artziniega hamar egunez astintzen dituzten jaiak. Ekitaldiak 18:30ean hasiko dira frontenis txapelketarekin eta 21:00etan txirrindularitza elkarteko kideek irakurritako pregoiak eta ondorengo txupinak emango die hasiera ofiziala jaiei. Horren aurretik, kuadrillak 20:00etan bilduko dira Goiko Plazan zurrakapotea edateko eta Builaka taldearekin batera kalejira egiteko. Horren ondoren, gastronomiaz, kirolaz, umeentzako ekintzez eta musikaz beteriko hamar egun etorriko dira. Ekitaldi gehienak, dena dela, bi asteburuetan pilatzen dira, nahiz eta astegunetan ere ekitaldiak dauden, batez ere txikientzat.
Musikari dagokionez, aste honetako zapatua izango da egunik eta indartsuena, Sotano 54, Hesian eta Priscilla Band taldeen kontzertuarekin. Gainerakoan, gaur Izargi taldea arituko da, eta bigarren asteburuan Akerbeltz eta Arizgoiti. Viento de Locos folk taldea ere arituko da bigarren barikuan, Vital Kutxak antolatutako kontzertu batean.
Aurreko lau urteetan bezala, kuadrillen arteko txapelketa bat jokatuko da. Horretarako, zazpi proba izango dira baliagarri: dagoeneko benetako tradizioa den bonbona-lasterketa, “iturritik iturrira” kronoigoera (sailkapen arrunta eta mozorroak), playbacka, tortilla-lehiaketa, azken domekako soka-tira eta argazki lehiaketa.
Azkenik, aipatu beharra dago aurten, eta beste urte batez dirua murriztu behar izan den arren, herritarren inplikazioari esker programako ekitaldi gehienak mantendu direla eta beste batzuk berreskuratu edo txertatu dira, hala nola jaietako argazki-lehiaketa edo lehen zapatuko bertso-saioa, herri bazkariaren barruan egingo dena.