Aiaraldeko turismoa kudeatzen duen elkarte publiko-pribatuak, Aiaraturrek, kanpaina berria aurkeztu du udara begira. Kanpainaren leloa "Aiaraldea, zapore bat paisaia bakoitzeko" da eta bere helburua da datozen hilabeteetan gurera bisitariak erakartzea.
Horretarako, alde batetik, esku-orri berriak argitaratu dituzte, zeinetan eskualdeko informazio turistikoa biltzen den, modu zuzenean eta formatu erabilgarrian, gure eskualdea bisitatzen duen turistaren ezaugarriei egokituta. Liburuxka horietan, besteak beste, ondare arkitektonikoari eta naturalari buruzko informazioa ematen da, bai eta eskualdeko museo-eskaintzaren gaineko xehetasunak. Horretaz gain, agenda bat erantsi dute, zeinean eskualdeko gertakariak zerrendatzen diren, helbide interesgarrien direktorioarekin eta beste jakingarri batzuekin batera.
Beste alde batetik, kanpainaren barruan hiru minutuko iragarkia grabatu dute, “eskualdearen ezaugarriak eta xarma ezagutarazteko helburuarekin”. Bideoa webgunean bertan zein sare sozialetan ikusi ahal izango da (Facebook, Vimeo eta YouTube).
Kanpaina berri honetaz gain, uda honetan abian egongo den beste ekimen berri bat “Txakolinaren Ibilbidea” izango da. Ekimen hori maiatzaren amaieran aurkeztu zen eta gastronomia eta turismoa enologiarekin uztartu gura du.