Foroak kultur eta kirol elkarteen jarduerak koordinatu eta bultzatzeko asmoz sortu da. Elkarteek, udalak eta eskualdeko kulturako teknikariak hartuko dute parte.
2011ko azken hilabeteetatik hona hainbat bilera, kontaktu eta hausnarketa egin ostean, atzo egin zen azkenik Artziniegako elkarteen foroaren lehen bilera ofiziala udaletxean. Bertan, azkenaldian egindako lanaren laburpena egin zen eta aurrerantzean zelan funtzionatuko den zehaztu. Topagune berri honetan, hiriko elkarte guztiek hartuko dute parte, udalaren ordezkariekin eta eskualdeko kultur teknikariarekin batera.
Ekimen honen bidez, aspaldiko arazo bat konpondu nahi da: kultur jardueren arteko koordinazio falta. Izan ere, Artziniegan urte osoan jarduera asko egoten da arlo guztietan, baina batzuetan elkarren arteko komunikazioa eskasa izaten da eta jarduerak solapatu egiten dira. Era berean, elkarte guztien arteko lankidetza ere sustatu gura da.
Atzoko bileran hainbat gai jorratu zen. Alde batetik, urteko egutegia elkarte guztiei banatu zitzaien, berrikusi eta osatzeko, eta elkarteen arteko komunikazioa hobetzeko posta-zerrenda sortzea erabaki zen. Bestetik, hileroko egutegia jartzeko panel bat atontzeko konpromisoa hartu zuen udalak, bai eta web-gunearen bidez zabaltzekoa ere. Azkenik, elkarte batzuek herria dagoen lokal falta gogora ekarri zuten, eta udaleko ordezkariek konpromisoa hartu zuten lehengo udaletxearen behetan elkarteentzako lokal partekatua jartzeko aukera aztertzeko.