Herenegun biltzarkide-talde batek Artziniega Museoa bisitatu zuen, eta atzo Artea elkarteko kideek agerraldia egin zuten Kultura Batzordean. Artea elkarteak prentsa-oharra kaleratu du gaur eta ezkor agertu da ez dutelako inolako konpromisorik lortu, zorion-hitzetatik harago.
Duela aste batzuk Legebiltzarrean egin bezala, asteon, Artziniega Museoko arduradunek Arabako Biltzar Nagusietara eraman dute museoak bizi duen egoera. Hala, asteartean, talde guztietako biltzarkide batzuk museoa bisitatu zuten eta, Artea elkartearen arabera, oso inpresio ona hartu zuten eta museoa ixtearen kontra agertu ziren, baina “promesaren bat emateaz aparte konpromisorik ez”.
Atzo, martxoak 21, berriz, Biltzar Nagusietako Kultura eta Kirol Batzordearen aurrean agertu ziren; Arteako ordezkariak “Legebiltzarreko agerraldia burututakoan jaso zuten susmoarekin” itzuli dira. Diotenez, “zorionak bai” baina “irtenbiderik ez zioten eman”, eta hori dela eta, “arriskuan” jarraitzen dutela adierazi dute.
Amaitzeko, “harrituta” agertu dira Artziniega Museoak “politiko guztiak elkartzeko gaitasunagatik”, denek aitortu dutelako elkarteak egindako lana, zorionak eman dizkietelako eta museoa zabalik egoteko nahia adierazi dutelako. Hala ere, salatu dute “zorion eta ezagupenekin bakarrik, museoa zabalik edukitzea amets bat” izango dela.