Ostegun honetan, hilak 22, Euskaraz ezta? saileko lehenengo hitzaldia egingo da Artziniega Museoan. Oraingoan, euskarak kirol munduan duen presentziaz eta garrantziaz jardungo dute puntako kirolari bik: Koikili Lertxundik eta Maider Undak. Koikili Athletic Clubeko lehen taldeko futbolaria da, eta Maider borrokalari profesionala da (10 aldiz izan da Espainiako txapeldun eta Joko Olinpikoetan hartu du parte). Hitzaldian, Aiarako Kuadrillako Euskara Zerbitzutik adierazi digutenez, "beren lanbide eta bizimoduan ere euskaraz aritzea posible dela erakutsiko digute, entzuleen galderei erantzungo diete eta, bukatzeko, autografo eta argazkien txanda izango da".
Hitzaldia arratsaldeko 19:00etan izango da eta, esan bezala, kuadrillako Euskara Zerbitzuak antolatu du eta, era berean, Artziniegako Gabonetako jardueren egitarauaren barruan dago. Honetaz gainera, hainbat eta hainbat izango dira urtarrilaren 5era bitartean gurean egingo diren ekitaldi eta jarduerak. Erantsita dagoen dokumentuan horien berri jaso dezakezue.