Domekan Artziniega Museoak ateak zabalduko ditu lehengo ofizioak eta jarduerak erakusteko. Horretaz gainera, Goiko Plazan mikologia-erakusketa egingo da.
Artziniega Museora doan bisitariak edozein egunetan ikus dezake, bertatik bertara, lehengo ogibideen eta jarduera ekonomiko eta sozialen berri ematen duen erakusketa finkoa. Baina etzi gehiago ikusi ahal izango du, museoak ateak zabaldu eta “Museo Bizia” izenburupean antzeztutako bisitaldiak eskainiko direlako. Hala, museoaren atal gune guztietan artisauek Euskal gizartean XX. Mendearen erdialdean nagusi ziren jarduerak gogoraraziko dituzte. Besteak beste, Luis Padurak errementariaren lana erakutsiko du, eta kandelagilea, jostunak, botikaria, eskolako maisua edota dendaria ere handik ibiliko dira. Tabernako karta-jokalariak ere ez dira faltako. Bisitarientzako Gaztain erreak egongo dira.
Ez da domekan hirian egongo den ekitaldi bakarra; izan ere - perretxiko-eskasiak behartuta ohi baino beranduago-, Goiko Plazan perretxiko-erakusketa egingo da Otsati Elkarteak antolatuta eta Gurutzeta Mikologia Elkartearen laguntzaz. Erakusketaz gainera, perretxiko dastaketa egongo da Goienkaleko Herriko tabernan, eta sariak ere zozketatuko dira.