Osasun-zentro berria egiteko lanak aurtengo maiatzean hasi ziren, eta datorren udarako amaituta egotea aurreikusten da.
Bost hilabete joan dira Carlos Garaikoetxea urbanizazioan osasun-zentro berria egiteko lanak egiten hasi zirenetik, hasierako aurreikuspenek bere horretan diraute eta udalak uste du 2012ko udan zabaldu ahal izango dela. Zentroa eraikitzeko milioi erdi euro bideratuko da eta horri esker orain udaletxeko behetan eskaintzen diren kontsultak (medikuntza eta erizaintza) herrigunean bertan izango dituzte herritarrek. Bost gela egongo dira zerbitzuok emateko. Horretaz gain, pediatria zerbitzua alortzea da asmoa, beste herri batzuekin partekatuz, Artziniegarekin adibidez. Zerbitzu hori behin eta berriz ari dira eskatzen herri bi hauetako bizilagunak, azken urteotan jaiotze-tasak gora egin duelako.
Osasun-zentroa eraikitzearekin batera, ingurua ere urbanizatu egingo da Eusko Jaurlaritzaren Erein programaren bidez. Hala, hamazortzi auto aparkatzeko plazak egingo dira, eta anbulantziarako beste plaza bat.