Udalak antolatutako ikastaro eta jardueretan izena emateko epea gaur bertan amaituko da. Gutxi gorabehera, aurreko urteetan eskainitako jarduerak mantendu dira.
Urtero lez, urria iristearekin batera, Artziniegako Udalak antolatzen dituen ikastaroak hasiko dira. Izena emateko epea aurreko ostegunean ireki zen, eta gaur bertan amaituko da. Izena emateko Vital Kutxan ordainketa egin behar da eta gero udaletxean ordaingiria aurkeztu. Prezioak 42 eta 150 € bitartekoak dira (erroldatuentzat), eta tarifa bereziak daude ikasle eta langabetuentzat. Erroldatuek lehentasuna daukate, baina lekurik egonez gero erroldatu bakoak ere apuntatu ahal izango dira.
Ikastaroen barruan esku-lanekin lotutako jarduerak egongo dira (pintura, otzaragintza, egurra lantzea...), bai eta kirolarekin lotutakoak (pilates, gimnasia...). Areto-dantzak ikasteko hiru talde osatuko dira, izan ere, jarduera honek arrakasta handia izan du azken urteotan Artziniegan. Horietaz gain, eta ikastaroetatik aparte, udalak jakinarazi du aste honetan euskara ikasteko taldeetan izena emateko epea zabalik dagoela, eta Berdintasun Sailak ikastaro bi antolatuko dituela, bata haurrei masajeak ematen ikasteko, eta beste "Bikoteak sukaldean" izenekoa.
Azkenik, aipatu behar da Aiarako Txirrindularitza Elkarteak "ziklismo-proba" kanpaina abian jarriko duela, eta Ganzorrotz Mendizale Taldeak neguko prestakuntza fisikoko eskolak emango dituela kiroldegian.