Batzar administratibo eta abeltzainekin zegoen desadostasuna gainditze bidean da. Urduñatik Añesera eta Anguloko Ahedo herrira doan errege-bide hau eskualdearen ardatza izan zen antzina.
Laster Aiaraldeak bere lehenengo “bide berdea” izango du. Azken urteotan Arabako Foru Aldundiak bizikletaz eta oinez ibiltzeko pentsatuta dauden bide batzuk atondu ditu (Vasco-Navarro trenbidea, Landako urtegia…), eta gurera ere helduko da turismo aktibo eta jasangarria sustatzeko azpiegitura horietariko bat: Aiara edo Sopeñako Errege Bidea. Bide hori Urduñatik Angulo haraneko Ahedoraino doa, Aroko garatetik Gaztelara zihoan bidearekin bat eginez, eta adarrak ditu bai Artziniegaraino baita Kexaaraino ere. Antzina, eskualdea egituratzeko ardatza izan zen, eta hiri eta feria nagusiak lotzen zituen; horren erakusgarri da eskualdeko lehenengo giza aztarnak bidearen inguruan topatu izana eta lehenengo herrixkak ere bide horren inguruan sortu izana. Balio historiko itzela dauka, beraz, eta erakundeek uste dute berreskuratzeak abantailak ekarriko dituela baita turismoaren sektorerako ere.
Lana prestatzeko batzarrak 2010eko udan hasi ziren, aldundia eta Aiarako udalaren artean, baina batzar administratiboek ez ei zuten horren berri izan. Batzar administratiboek bidearen erabileraren gaineko eskubideak izan badituzte, eta horrek proiektua ia urtebetez geldiarazi du. Udalbatza berria osatutakoan, ostera, berriro heldu zaio kontuari, eta udala aldundiarekin eta bidea atonduko duen enpresarekin batzartu da. Udalak eskatu egin du batzar administratiboen erabilera-eskubideak errespetatu daitezela eta alderdi ludikoa abeltzainen interesekin uztartu dadila. Egin beharreko lanak atontze-lanak dira batez ere: tarte batzuk egokitu, hesiak eta igarobideak hobetu, zubiren bat egin eta seinalizazioa jarri. Asmoa da bide berdea Urduñatik Añesera joatea da, eta handik Artziniegaraino, Soxotik pasatuz.