Arabako Foru Aldundiak lehen aldiz eman du sari hau, hizkuntz ondarearekin lotutako lanak ikasleen artean sustatzeko. Trebiñuko eskolak bigarren saria jaso du.
Aretako eskolako 5. eta 6. mailako ikasleek Areta eta inguruetako hizkuntz ondareari buruzko lan batekin irabazi dute Gerardo López de Guereñu Sariaren lehenengo edizioa. Sari horrek Arabako etnografia, folklore eta toponimiari buruz lan ugari egin dituen izen bereko etnografoa omentzen du. Era berean, euskarak Arabako gizartean izan duen presentzia ezagutzera emateko asmoz sortu da, bai hizkuntza ondareari buruzko lanen bidez (euskara gizartean, toponimian, gaztelanian utzi dituen aztarnak…), bai euskararekin zerikusia daukaten kontakizunak, bizipenak, esaerak, jolasak eta abar jasotzen dituzten lanen bidez.
Aretako ikasleek euren lanean -“Areta” izenekoa- herriko eta inguruetako hainbat leku-izen jaso eta haien jatorri eta esangurari buruzko jakingarriak eman dituzte. Bigarren saria, berriz, Trebiñura joan da, Lehen Hezkuntzako ikasleek egindako “Hiru tribu” lana sarituz. Azkenik, hirugarren saria Araiako eskolako ikasleek hartu dute, “Amamio” lanarekin.
Sariari izena ematen dion pertsonari buruzko datu batzuk ematea ere komeni da: Gerardo Lopez de Guereñu Galarraga (Gasteiz, 1904 - 1992) Arabako etnografian, folklorean eta toponimian ez eze historia eta argazkigintza arloetan be nabarmendu zen. Liburu eta artikulu sorta izugarria idatzi zuen herrialde honen inguruan eta horietatik Voces alavesas eta Toponimia alavesa seguido de Mortuorios o despoblados y pueblos alaveses nabarmentzen dira. Erdaraz idatzi bazuen ere, bere lanek duten garrantziagatik Euskaltzaindiak euskaltzain ohorezko izendatu zuen eta Arabako etnografiaren aitalehena dela esan ohi da.