Kike Liñero entrenatzaileak teknifikazio ikastaro bat emango du Artziniegan, Manu Sarabia eta Juan Carlos Santibañezekin batera. Ekainaren 27tik uztailaren 2ra bitartean egingo da, eta izena emateko epea amaituta, asko eta asko izan dira izena eman duten neska-mutikoak, artziniegarrak zein kanpokoak.
Ikastaro honen arduradun Kike Liñero entrenatzailea izango da, baina Manu Sarabia eta Juan Carlos Santibañez parean edukiko ditu laguntzaile. Izan ere, duela urte bi Santibañezek Artziniegan abian jarri zuen futbol-eskola izan da oraingo campusaren aurrekaria. Santibañez Athletic Fundazioak Enkarterrian oinarri-futbolerako duen arduraduna da, eta Balmasedan eta Urduñan ere antzeko proiektuei ekin die.
Antolatzaileek adierazi dute “zerbait ezberdina” egin gura dutela udako ikastaro honekin, “zelaian bertan umeekin” egonda, eta “urtean zehar entrenamenduetan espezifikoki jorratzen ez diren alderdi zehatz batzuetan” indar eginez. Dena dela, argi utzi dute “futbolean jolastu” gura duen guztientzako zabalik dagoela.
Ikastaroan, esan bezala, bederatzi eta hamabost urte bitarteko neska-mutil asko arituko dira futbolean trebatzen. Adinaren araberako taldetan banatuta, goizez futbolaren alderdi teknikoak jorratuko dituzte, eta arratsaldez, berriz, kirol-guneko kafetegian bazkaldu eta igerilekuan bainatu ostean, ikasleen arteko lehiaketa txikiak egingo dira. Autobus-zerbitzua egongo da Bilbotik, handik eta Enkarterritik datozen umeentzat.