Udalak aurten ere uztaileko jolas-txokoak antolatu ditu, euskararekin batera ingelesari lehentasuna emanez. 3 eta 14 urte bitarteko neska-mutikoek eman dezakete izena ekainaren 10era arte.
Aurten hainbat berrikuntza izango dituzte Artziniegako jolas-txokoek; izan ere, egutegi eta ordutegi zabalagoa izateaz aparte, ingelesezko jarduerak ere egongo dira, eta udalekuek irauten duten epean umeek nahi duten astean parte hartu ahal izango dute. Jolas-txokoak ekainaren 27tik uztailaren 31ra bitartean izango dira, astelehenetik ostiralera, 10:00etatik 14:00etara. Gainera, ume txikiak dauzkaten gurasoek haurreskola-zerbitzua ere izan dezakete, 8:00etatik 10:00etara, beste tarifa batekin.
Jarduerei dagokienez, udalak jakinarazi du horien xedea “umeek euren oporretan goizak hezkuntza arloko hezitzaileekin igarotzea dela”, eta “hainbat motatako ekintza egingo direla: eskulanak, jolas ludikoak, jolas kooperatiboak, ginkanak, uretako ekintzak, kirolak… lehentasunez ingelesa erabiliz”.
Jolas-txokoetan 3 eta 14 urte bitarteko neska-mutikoek eman dezakete izena maiatzaren 25etik ekainaren 10era bitartean, Vital Kutxan diru-sarrera eginez eta ondoren udaletxean aurkeztuz. Horretarako, Artziniega udalerrian egon behar dute. Dena dela, erroldatutakoen leku guztiak bete ezean, erroldatu bako umeak ere apuntatu ahal izango dira.