Udalak 53.000 euro ordaindu beharko dizkio duela 20 urte futbol-zelaiaren obra egin zuen enpresari, auzia hainbat urtez epaitegietan egon ostean. PPko bozeramaileak dio ‘EAJk izandako utzikeriagatik’ gertatu dela hau.
Artziniegako PPko bozeramaile Joseba Elejaldek gogor kritikatu zuen ostiralean futbol-zelaiaren auzian udalak izandako jokabidea. Bere esanetan, ‘gobernu-taldeak eta arkitektoak duela 20 urte egindako kudeaketa okerra dela eta’ udalak 53.000 euro ordaindu beharko dizkio lanak burutu zituen enpresari, Viveros Viteri SLri. Izan ere, kirol-instalazio hori egin zenetik arazoak baino ez dira egon, eta enpresak bere garaian egindako likidazio okerragatik auzitara eroan zuen Artziniegako Udala. Azkenik, alderdiok akordio batera heldu dira eta udalak 53.000 euro ordainduko dizkio enpresari.
Joseba Elejaldek gogoratu duenez, ‘duela lau urte Partidu Popularrak arkitektoaren erantzukizun zibila zehaztuko zuen txosten juridiko bat egiteko eskatu zuen, bera izan baitzen, obrako zuzendari gisa, enpresari egindako likidazio okerraren arduradun’. Txosten horren bidez ‘arkitektoari ezarriko zitzaion konpentsazioa egiteko ardura, eta ez udalari”. Elejaldek, amaitzeko, ondorengoa adierazi du: “Hala ere, eta txosten hori ordainketaren arduraduna zein zen argitzeko gakoa izan zitekeen arren, berriro ere gure udalean agintean dagoen alderdiak herritarren interesak defendatzeko orduan duen gaitasunik eza agerian utzi du, eta herritarrok gastu handi horri aurre egitera behartu gaitu, horrela orain egin behar dugun gastu handi hori saihestu zitekeela jakinda ere”.