Eguraldi ona lagun, San Prudentzioei ekin zieten atzo aiarrarek. Gaur goizean, ohiko danborradan batu dira Etxaurren ikastolako umeak.
Gaur San Prudentzio dugu, jaieguna Araba osoan eta Aiarako jaietako egun handia. Hori dela eta, gaur goizean danbor-hotsak izan dira nagusi Arespalditzan, Etxaurren ikastolako umeek egin duten daborradan. Horrezaz gainera, arratsaldez aizkolari-txapelketa jokatuko da eta gauen dantzaldia Jamaika orkestrarekin. Baina animazioa ez da gaur bertan hasi, txupinazoa atzo arratsaldeko zazpietan bota baitzuten. Algarak gaueko ordu txikiak arte iraun zuen.
Zapatura arte, jaien martxak ez du etenik izango, eta bihar eta etzi txikienei eta nagusienei eskainitako jai-egunak izango dira. Ostiralean, umeentzako jarduerek beteko dute eguna, eta larunbatean, ostera, hainbat ekitaldi egongo dira, gustu guztietarako: ehiza-txapelketa, kantaldia, bolo-jaurtiketa, gauean dantzaldia... kirolak ere leku zabala izango du zapatuan; izan ere, bi txirrindularitza-lasterketa egingo dira bertan, Arabako Hiru Egunetako 3. etapa eta kadete mailako Jesus Isasi memoriala.