Urduña Garoñatik hogeita hamar kilometrora egonda, larrialdi nuklearreko II. gunearen barruan dago. Udalak nahi du udalerria zentrala itxi osteko Dinamizazio Planaren barruan egotea, eta hala eskatu dio estatuari.
Garoñako zentral nuklearra 2013. urtean itxiko duela agindu du Espainiako Gobernuak. Itxiera hori dela eta, gobernuak zentralaren eragin-esparruan dauden herrietako ekonomia dinamizatzeko plan bat jarriko du abian. Esparru hori larrialdi nuklearreko II. gune modura sailkatuta dago eta, berez, “iraupen luzeko babes-neurriak” egokitzen zaizkio. Esparru horren barruan 78 udalerri daude, tartean Arabako batzuk eta Urduña (Bizkaiko bakarra). Hala ere, otsailean, Diputatuen Kongresuak ezetza eman zion EAEko udalerriak zentrala itxi osteko dinamizazio-neurriak jasoko dituzten udalerrien artean sartzeari.
Ezetzaren aurrean, Eusko Legebiltzarreko Ingurumen Batzordeak Legez besteko Proposamen bat onartu zuen martxoaren 15ean, Espainiako Gobernuari zentrala ixteko eskaera berretsiz eta, era berean, EAEko udalerriak Dinamizazio Ekonomikoaren eta Enpleguaren Neurrien Planean modu eraginkorrean sar daitezen eskatuz.
Urduñako Udalak, bere aldetik, adierazi du plan horretan sartzea gura duela, eta 2010eko maiatzean, Burgoseko Gobernu Ordezkariordeari estatuaren planarekin bat datozen jardueren zerrenda bat bidal zion. Jarduerok ondorengo helburuak dauzkate: industria-sarea berriztatzea eta garatzea, komunikazio-azpiegiturak sortzea, prestakuntza sustatzea -batez ere langabetuen artean-, garapen jasangarria eta inguruaren natur balioen sustapena, eta azkenik, ikerkuntza, garapena eta berrikuntzari lotutako jarduerak bultzatzea.