Gasaren igoerak kaltetutako herrietako udalek jarraipen-batzorde bat sortu dute Arabako Foru Aldundiarekin batera. Laginak hartu gura dituzte Repsolen biltegietan, kontsumoaz eta gasaren kalitateaz zalantza handiak dauzkatelako.
Azken egunotan, propanoaren fakturaren igoerak kaltetutako herrietako udalek gestioak azkartu dituzte erakundeen aurrean, Repsol kontua argitzera behartze aldera. Barikuan Gasteizen Arabako Foru Aldundiarekin batzarra egin zuten, jorratu daitezkeen bideak aztertzeko. Batzarrean erabaki zen Aldundiak laguntza juridikoa emango diela udalei, eta erreklamazioak bideratzen ere lagunduko diela. Horretarako, norbanakoentzako zein erakundeentzako erreklamazio-orri bat egin du. Artziniegako alkate Agurtzane Llanok esan digunez, orriok Artziniegako udaletxean herritarren eskura daude dagoeneko, eta web orrian zein liburutegian ere hartu daitezke. Argi utzi gura izan du, dena dela, “erreklamazioak herritarrek egin behar dituztela, ez udalak”, eta eskatu egin die erreklamazioaren eta fakturen kopia bat uzteko, udalak jakin dezan zenbat eta zelan egin diren.
Horretaz gain, Artziniega eta gainontzeko herrietako udal-agintariek adierazi dute “zalantza handiak” dauzkatela neguan egindako kontsumo handiaz eta gasaren kalitateaz. Repsolek behin eta berriro esan arren kontsumoaren igoera benetakoa dela, susmoa dago kalitate eskasagoko gasa (eta ondorioz, arinago kontsumitzen dena) ez ote diren erabiltzen ibili, urtarrila eta otsaila iazkoak baino askoz epelagoak izan dira eta.
Barikuan egindako batzarrean, gainera, jarraipen-batzorde bat sortu zen, AFAko zein Artziniega, Guardia, Zuia eta Urkabustaizko udaletako ordezkariek osatuta. Batzorde hori Industria Sailarekin batzartuko da, laginak hartu ditzaten eskatzeko, Industria Saila baita arlo horretan eskumena daukana. Izan ere, laginak legearen arabera hartu behar dira, Repsolek indargabetzeko modurik izan ez dezan. Repsolek, bere aldetik, adierazi du “ez diela udalei laginak hartzen utziko”.