Agurtzane Llano atzo bildu zen Repsolekin, baina konpainiak esan zuen tarifek eta kontsumoak gora egin dutela eta, ondorioz, fakturak justifikatuta daudela. Kaltetutako udalerrietako alkateek Repsoli “minimo batzuk” bermatzeko eskatu diote, eta “bestelako neurriren bat” hartzeko aukera aztertzen ari da kaltetutako beste udal batzuekin batera.
Gasaren fakturaren gorakadak hautsak harrotu ditu Artziniegan. Aurreko astean propanoa kontrataturik duten bizilagunek ustekabe itzela hartu zuten abenduaren 15etik otsailaren 15era bitarteko faktura jasotzean; kasu gehienetan, iazkoaren bikoitza zen, eta zenbaitetan gehiago. Artziniegakoa ez da kasu bakarra, Euskal Herriko beste udalerri batzuetan ere (Ea, Bastida, Aramaio…) antzeko zerbait gertatu da, eta herritarrak oso haserre agertu dira Repsolekin, igoeraren berri eman ez dielako alde batetik, eta bestetik, irakurketetan eta kontsumoaren neurketan “akatsak” daudela uste dutelako. Kasurik okerrenetan, bigarren etxebizitza batzuetan irakurketa egin barik ia 500 euroko fakturak jaso dituzte. Asko eta asko izan dira udaletxera informazio eske joan direnak eta Repsolen euren kexa utzitakoak.
Egoera horren aurrean, Artziniegako eta kalteturiko beste udalerrietako alkateek bilera bat eskatu zioten Repsol konpainiari, argibideak jasotzeko eta herritarren artean dagoen ezinegonaren berri emateko. Bilera atzo egin zuten, 13:00etan. Guk Artziniegako alkate Agurtzane Llanorekin berba egiteko aukera izan dugu, eta bilera horretan esandakoak helarazi dizkigu:
Hasteko, Repsolen arabera, tarifak erabat justifikatuta daude: gasaren prezioak garestiagoak dira, 201eko abenduan 2009an baino %29 garestiagoa, eta urtarrilean %30. Prezio hori Espainiako gobernuak erregaietarako ezartzen dituen tarifen araberakoa ei da, tartean propanorako. Prezioak hainbat aldagairen arabera kalkulatzen dira: lehengaiarena, Itsaso-garraioarena, euro eta dolarraren arteko parekotasunarena, eta abar. Bestetik, Repsolek dio aurtengo neguan kontsumoaren gorakada handia gertatu dela (zehazki, kontsumoak %32 egin duela gora). Azkenik, badago beste faktore bat igoera azaltzeko: azken kontsumo-aldian bi aldiz aldatu dituzte tasak, eta horiek aplikatzeko orduan, aldi osoak kontuan izan beharrean, eguneko estimazioak egin dituzte (horrela diru gehiago eskuratzen da).
Azken faktore horri dagokionez, Artziniegako alkatearen esanetan, “herrietako ordezkariok uste genuen hortik zerbait erreklamatzeko modua egon zitekeela, baina tasen aldaketan iragartzeko dekretuak hori egiteko bidea zabaltzen du”. “Edozelan ere, udala ez dago ados gertatutakoarekin. Ez gaude ados urte batetik bestera fakturak %64 garestitzearekin. Uste dugu gutxieneko batzuk bete behar direla; hala nola, irakurketak hilerokoak izatea, ordainketak zatitzea eta propanoa duten herritarrei zein udalari behar den informazio guztia ematea. Beste aldetik, Bastidako alkate Ignacio Gilekin berbetan nabil, bestelako neurriren bat hartu daitekeen aztertzeko”.
AZKEN ORDUA:
Artziniegako Udalak gainontzeko udalerrietako alkateei zera proposatu die: herritarrei erreklamazioa egiteko orriak ematea eta udaletik Eusko Jaurlaritzako Kontsumo Sailan erreklamazio bateratua aurkeztea, irakurketen estimazioei dagokienez.