Orain dela astebete egindako bileran ez zen lortu, momentuz, aurtengo jai-batzordea osatzea. Elkarteek eta koadrilek egin gura dituzten ekitaldiak proposatzeko epea ireki du udalak.
Otsailaren 4an, aurreko barikuan, 2011ko jaiak prestatzeari ekiteko bilera egin zen udaletxean. Bertara agertu ziren hainbat elkarte eta koadriletako ordezkariak, bai eta aurreko batzorde batzuetako kideak ere. Bileraren gai nagusia jai-batzordea osatzea zen, irailaren 2tik 11ra bitartean ospatuko diren jaiak antolatzeari ekiteko. Gauza jakina zen 2010eko batzordea osatu zuten koadrilek ez ziotela berriro erronkari helduko, eta hala baieztatu zuten batzarrean. Bertaratu ziren gainontzeko lagunen aldetik ere ez zen, momentuz, batzorde finko bat osatzeko boluntariorik agertu. Udalaren aldetik, bestalde, adierazi zuten aurten, espero zitekeen bezala, jaietarako aurrekontua txikiagoa izango dela, egoera ekonomikoak hala beharturik.
Gauzak horrela, eta batzordea osatzeko partaideak agertu bitartean, udalak bere gain hartu du ahalik eta lasterren antolatu eta lotu behar diren kontuak koordinatzeko ardura, hala nola musika-emanaldien kontratazioa eta elkarteek proposatu gura dituzten ekitaldi eta jardueren bideragarritasuna aztertzea. Horri dagokionez, elkarteek hilaren 18ra bitarteko epea daukate jaietarako aurreikusten dituzten jarduerak aurkezteko, ekarriko duten gastua eta aurreikusitako data adieraziz. Horren ostean, egutegia zehazten joateko beste bilera bat egingo da.