Elkartea kexu da lur gainean entrenatzeko pista egiteko asmoak geldirik daudelako. Alkateak dio proiektu finkoa falta dela, eta kontua aztertzen ari direla.
Urte batzuk badira Amurrioko txirrindulari-elkartea mendiko modalitateak entrenatzeko leku bat eskatzen hasi zenetik. Aurreko asteko osoko bilkuran elkarteko presidente Alfredo Cerrillok berriro azaldu zuen elkarteak azpiegiturarik ezak dakarren arazoengatik daukan kezka. Cerrilloren arabera, “instalaziorik ez daukan kirol-elkarte bakarra” dira eta, hori dela eta, errepidera ateratzea baino ez zaie geratzen. Horrek, dio, “harrobia sortzeko eta lehiatzeko orduan kalte” egiten die, neska-mutilek ez daukatelako leku seguru batean entrenatzeko aukerarik. Urtero egiten den btt proba egiteko lekurik ere ez daukate, eta Reforreko kross-pistan egin behar izaten dute. Cerrillok adierazi zuen birritan aurkeztu dutela proiektua udalean: lehenengoan Bañuetaibarreko lursailetara kamioietan lurra ere eroan zuten zirkuitua egiteko, baina hurrengo egunean proiektua bertan behera geratu ei zen. Bigarrenean, ostera, eskaerari uko egin zion udalak.
Alkateak erantzun zuen Bañuetaibarreko lursail horien barruan batzuk ez direla udalarenak, eta proiektu finkorik ezean, ezin direla espropiatu. Gaineratu zuen udala kokapen egokiak aztertzen ari dela.