Kantauriko Urkidetzak azpiegituren plan zuzentzaile berria egin du. Guztira 23 milioi euro bideratuko dira, eta lanik garestiena Artziniegako ur-araztegia izango da.
Aiarako ur-partzuegoak, Kantauriko Urkidetzak, onartu egin du azkenik eskualdeko ur-azpiegiturak hobetzeko plana. Plan horretan 23 milioi euroko inbertsioak aurreikusten dira, eta Urkidetza, Aldundia, Jaurlaritza, udalak eta Iparraldeko Ur Konfederazioa egongo dira. Eskualde osoan egingo diren lanen bidez, ura tratatzeko instalazio guztiak berrituko dira, Izoriatik dena kontrolatzea ahalbidetuko duen sistema batera egokitzeko.
Plan zuzentzaile honetan aurreikusten den inbertsiorik handiena Artziniegako ur-araztegia eraikitzeko egingo da. Artziniegan arazo larria da ur zikinena, arazo historikoa. Azken urteotan okerrera egin du, gainera, populazioaren hazkundea dela eta. Guztira 100 milioi euro bideratuko dira araztegia egiteko eta Erretes Tudela herria sare orokorrarekin konektatzeko. Lanen tramitazioa datorren urtean hasiko da eta Eusko Jaurlaritzak eta Aldundiak sinatutako hitzarmenaren bidez finantzatuko da.
Beste herriei dagokienez, Laudion beste ur-biltegi bat eraikitzea aurreikusten da, 2.500 metro kubokoa, gaur egun bakarra dagoelako, San Bartolomen. Ur-biltegi horren bidez heltzen da Maroñotik, hain zuzen ere, kontsumorako ura Laudiora. Laudioko udal-termioaren barruan dago, horrezaz gainera, Olarteko presa zaharra, 1983ko uholdeetan hondatutakoa; behin betiko zerbitzutik kanpo uzteko 400.000 euroko kostua izango duten lanak egingo dira bertan. Amurrioren kasuan ere ura Maroñotik heltzen da Izoriatik pasatuz. Gorbeian egiten diren bilketak sistema horretara gehitu beharko dira egingo diren obrekin, Izoriatik kontrolatzeko.
Plan Zuzentzailearen aurrekontuaren barruan ez dago Markixanako eta Basaurbeko ur-araztegiak egiteko dirua, ezta kolektoreen sarea egitekoa ere, baina badago milioi bat euro kolektoreak kokatuko diren lursailak erosteko. Beste 2’1 milioi euro aurreikusi dira eskualdeko saneamenduaren bigarren faseari ekiteko. Bigarren fase horretan herri txikietara helduko ei da, hala nola Larrinbe, Kexaa edo Lekamañara. Lan horiekin, Okondo eta Maroñoko urtegiaren arteko konexioari konponbide bat bilatuko zaio, izan ere, konexio hori ez egoteak tirabira handiak sortu izan ditu Okondoko Udalaren eta Urkidetzaren artean.