Iaz Aralar alderdia utzi zuten Aiaraldeko militanteak, herrialdeko beste kide ohi batzuekin batera, maiatzeko hauteskundeetara zelan aurkeztu aztertzen ei dabiltza. Talde horretako iturriek ez dute albistea baieztatzen, ezta ukatzen ere.
Urte erdi baino gehiago joan da Aralar-Aiaraldeko militante gehienek alderdia utzi zutenetik. Horren ostean, bertoko herrietan marka propioekin aurkezteko asmoa agertu zuten, eta hala egin zuten egun daukaten udal-talde bakarrarekin, Artziniegakoarekin hain zuzen. Orain, maiatzeko hauteskundeak hurreratzen doazen heinean, mugimenduak hasi dira; aurreko astean komunikabide batek zabaldu zuen Aiaraldeko eta Asparrenako aralarkide ohiak “Arabai” marka berria sortzeko asmotan ei dabiltzala, eta aurreko ostegunean, hilak 20, militante talde honek batzarra egin zuen epe laburrean izango duten jobidea zehazteko.
Mugimendu hauetaz galdetuta, talde horretako iturriek adierazi digute “ezin dutela albistea baieztatu”, baina ez dute ukatzen “Araba osorako proposamen bat” mamitzen dabiltzala, maiatzeko hauteskundeei begira. Era berean, gaineratu dute “datozen asteotan” honen inguruko berriak egongo direla.