Gaur arratsaldeko 18:00etan hirurogei bat lagun batu dira Artziniegako udaletxearen aurrean, Udalaren deialdiari erantzunez, aurreko domekan herriko bizilagun batek jasan zuen sexu-erasoa salatzeko. Hamar minutuz isilean egon ondoren, Agurtzane Llano alkateak berba egin du "neska zein bere familiari elkartasuna adierazteko" han batutakoen izenean, eta "honelako kontuak berriro geratu ez daitezen" dei bat eginez.
Sexu-erasoaren ustezko egilea, neskaren koinatua ei den 32 urteko gizonezko bat, Ertzaintzak atxilotu zuen domekan bertan, eta epaitegitik pasatu ostean kartzelan dago.