Murgako administrazio-batzarrak Remai SA enpresa auzitara eroan du

Erabiltzailearen aurpegia

Herritarrak kexu dira Remai SA enpresaren jarduerak eragiten duen inpaktuagatik. Azaroaren 5ean salaketa ipini zuten Amurrioko epaitegian, “ingurumenaren kontrako delitua” leporatuz.

Herritarrak kexu dira Remai SA enpresaren jarduerak eragiten duen inpaktuagatik. Azaroaren 5ean salaketa ipini zuten Amurrioko epaitegian, “ingurumenaren kontrako delitua” leporatuz.

Murgako Markixana auzoan dagoen Remai SA enpresaren jarduerak kezkatuta eta haserretuta dauzka inguruko bizilagunak. Lantegitik ateratzen diren zaratek, hautsek eta hondakinek kalte handia egiten ei diete inguruari, pertsonei eta hurrean dauden etxeei. Hori dela eta, eta hainbat erakundetan salatu ostean, Murgako administrazio-batzarrak salaketa judiziala egitea ebatzi du, eta egin ere, Amurrioko epaitegian duela egun batzuk, azaroaren 5ean, hain zuzen.

Murgako administrazio-batzarrak Remai SAri kereila ipini dio “ingurumenaren kontrako ustezko delitu batengatik, siderurgia-piezak txikitzean sortzen diren zaratak, bibrazioak, hauts-emisioak eta isurkin kutsagarriengatik”. Kaleratutako prentsa-ohar baten bidez, batzarrak adierazi du Remaik “20 urte baino gehiago” daramatzala funtzionatzen, eta ez daukala “ez udal-lizentziarik ez bestelako baimen legalik”. 2001. urtean, antza denez, enpresak legeztatze-prozesuari ekin zion Aiarako Udalaren aurrean, “klasifikatutako jarduera” gisa, eta 2006tik behin-behineko baimena omen du “siderurgia-gaien berreskurapenerako”; hala ere, administrazio-batzarraren arabera, baimen hori “neurri zuzentzaileak ezartzeko eskatzen du jarduera hasi aurretik” eta hori “ez dago egiaztaturik”.

Markixanan kokatutako enpresa honen jarduera, zehazki, siderurgia-industriatik datozen pieza handiak jaso, gorde eta bertan dauden bi lubakietan txikitzea da. Horretarako piezak lehertu egin behar ditu. Prentsa-oharrean salatutakoaren arabera, “leherketa horien ondorioz, gasak eta hautsak isurtzen dira, eta enpresa barruan zein enpresatik kanpoko ortu eta etxeetan geratzen dira”. Horretaz gain, diote “eztanden indarrak osasunarentzat onargarriak ez diren zaratak eta bibrazioak” sortzen dituela, eta lantzean behin “baita arrakalak ere, inguruko etxeetan”. Izoria errekaren egoera ere kezka-iturri da bizilagunentzat, izan ere, euren esanetan “bai euria bai materialak bustitzeko erabilitako urak lubakietan pilatu eta, kutsatutako gaiez beterik, zuzenean doaz Izoria errekara”.

Egoera horren aurrean, eta ikusita “hainbat erakunde publikotan urteetan egindako salaketek” ez dutela emaitzarik izan, eta are gehiago, “erakundeok administrazioaren ikuspuntutik irregularra den funtzionamendua onartzeaz gain, salaketei batere jaramonik“ ez dietela egin, herritarrek, administrazio-batzarraren bidez, Remai SA enpresa auzitara eroan dute eta kereila jarri diote. Adierazi dutenez, kereila enpresaren ordezkari legalaren kontrakoa da, baina ez dute baztertzen “agintari administratibo edo funtzionario batzuen kontra” ere egitea, izan duten “jokaera arduragabeagatik”.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide