Ikasturtean zehar egingo du Aiara Txirrindularitza Elkarteak Arteko Gure Ama eskolan. Bizikletak garraio eta kirol moduan duen balioa erakutsiko diete 6 eta 14 urte bitarteko umeei.
Beste urte batez, Aiara Txirrindulari Elkarteak, Artziniegako udalaren eta Euskadi Fundazioaren laguntzaz, “Proba ezazu txirrindularitza” izeneko ekimena jarriko du abian, 2010-2011 ikasturtean zehar 6 eta 14 urte bitarteko umeen artean ziklismoa ezagutzera emateko helburuarekin. Kirol horren eta bizikletaren ikuspegi osoa eman gura dute antolatzaileek ekimenaren bidez, eta horretarako lau arlo nagusitan banatu dute: bizikleta garraiobide eta aisialdirako ibilgailu gisa, bizikleta kirol gisa, bizikletaren erabilera praktikoa eta bide-segurtasunari lotutako gaiak.
Antolatzaileen esanetan, garrantzi berezia emango diote bide-segurtasunari, umeek ondo ikasi dezaten errepidetik zelan ibili, eta kaskoa erabili behar izateko beharraz jabetu daitezen. Txirrindularitzak kirol moduan sustatzen dituen baloreak ere azpimarratu gura dituzte: laguntasuna, talde-lana, ingurumenaren errespetua, leku berriak ezagutzea eta abar.
Programa didaktiko hau Artziniegako Arteko Gure Ama herri eskolan egingo da, doakoa da, eta interesa duten guztiei dei egiten diete gaur, urriak 8, garai bateko udaletxean 19:30ean egitekoa den batzarrera joateko. Bertan, ordutegia zehaztuko da eta egon daitezkeen zalantzak argituko dira.