Lehenengo asteburu jendetsuaren ostean, bihar Andra Mariren eguna ospatuko da. Barikuan “Lendakaris Muertos” taldeak kontzertua emango du.
Lehenengo txanpa pasatuta, aste honetan zehar Artziniegako jaiek ez dute etenik. Bihar bertan Arteko Andra Mariaren jaieguna ospatuko da, hiriko patroiaren eguna, eta horren harira Santutegian egingo diren ekitaldiak izango dira nagusi; iluntzean dantzaldia egongo da “Ganeko” taldearekin. Barikutik aurrera asteburua bete-beterik dator, izan ere, bigarren asteburu hau izan ohi da asteburu “handia” Artziniegako jaietan. Barikuan bertan koadrilen ohiko afaria egingo da Barrenkalen, eta horren ostean musika izango da protagonista nagusia, Izate Faltsua, Zergatik Ez eta Lendakaris Muertos taldeen kontzertuekin.
Zapatuan Arteko Landan egiten den herri-bazkari ospetsuaren txanda izango da, bertan hainbat ekitaldi egingo dira: txinga-eroate txapelketa, kutxa kutxaren gainean, eta aurten nobedadea eta koadrilen arteko txapelketarako baliagarria izango den “twister” txapelketa. Betiko lez, zazpi eta erdietan Arteko Landatik hirirainoko jaitsiera egingo da eta gazteek buelta emango dute alde zaharretik ur eske. Arratsaldeko pilota-partiduen ostean, Arizgoiti eta Amaiur taldeen musikak girotuko du Garai Plaza ordu txikietara arte, eta atsedenaldian kulero eta galtzontzilo lasterketa egingo da.
Jaiak domekan amaituko dira, baina agur esan aurretik ez da arnasa hartzeko astirik egongo: goizean goizetik marmitako eta tortilla txapelketa egingo da Goiko Plazan, pintura-lehiaketa, txirrindulari-lasterketa, mus-txapelketa, koadrilen arteko herri-kirolak… Ohi lez, jaiak amaitzeko odoloste-jana egingo da Goiko Plazan, ardoa egongo da denontzat eta suziriak botako dira. Egun borobila, beraz, jaiei eta udari datorren urtera arte esateko.