Barikuan Arteko Andra Mariren omenez ospatzen diren Artziniegako jai nagusiak hasi ziren. Goiko Plazan koadrilak elkartu ostean, bederatziak jo zutenean Builaka perkusio-taldeko kideek, Builakarov familia ijito-buhamea bihurturik, pregoiari hitza eta itxura ipini zioten, dibertsiorako, kritikarako eta gure buruak zabaltzerako deia luzatuz.
Eguraldi argi eta beroa lagun, jaien lehen zati hau oso jendetsua izan da, batez ere zapatua; ekitaldietan jende askok hartu du parte eta kontzertuetan ikusle ugari egon da, aurreko urteetan baino nabarmen gehiago. Egitarauan urteko klasikoak bihurtu diren ekitaldiez gainera, hala nola Goiko Plazako herri bazkaria edota bonbona-lasterketa, aurten "Motorearen Eguna" ospatu da, auto-lasterketetan buru-belarri eta urte luzez lanean eta konpetitzen ibili diren Artziniegako pilotuei omenaldi egiteko. Kiroldegiaren inguruan zirkuitu bat ipini zen horretarako, eta bertan, besteak beste, Gorka Llano, Asier Parro eta Josetxu Diego artziniegarrak ibili ziren erakustaldia egiten.
Argazkiak: Xabi Zalbide
Data: 2010eko irailak 3 eta 4
Argazki bilduma ikusteko KLIKATU HEMEN