Aurten abuztuaren azken domekan egingo da, hilak 29. Alde zaharrean berritze lanak egiten ari dira, baina ordurako amaituta egotea aurreikusten da.
Artziniegako hiria bere hitzordurik sonatuenetariko bat ospatzeko prestatzen ari da: hilaren 29an egingo den Antzinako edo Erdi Aroko Azoka. Aurten hamahirugarren urtez ospatuko da Artziniegan milaka lagun batzen dituen ekitaldia, eta oraingoan abuztuaren azken domekan izango da hitzordua, iaz ekainean ospatu ostean. Izan ere, aurreko urteetan eztabaida luzea egon zen Azokak jaiekin batera izatearen egokitasunaren inguruan eta 2009an erabaki zen uda aurretik egitea. Emaitzarekin gustura geratu ez eta antolatzaileek erabaki zuten aurten jaien aurreko asteburuan egitea.
Azoka, ohi lez, goizeko hamar eta erdiak inguruan zabalduko da eta ordutik aurrera alde zaharreko kale eta plazak erdi arora itzuliko dira ordu batzuetarako. Goizez animaziorik ez da faltako Builakaren danbor-hotsekin, txotxongilo, tailer, ipuin-kontalari, antzerki edota txarriaren zatitzearekin. Arratsadean, berriz, danbor-hotsek atzera ere hiria hartuko dute eta hainbat antzerki-lan ikusteko aukera egongo da. Jakina, egun osoan zehar ez dira faltako Ginesen animaliak, Barrenkaleko sutegia, hegazti harraparien erakusketa, kalakariak eta beste hainbat kontu. Bisita gidatuak egiteko aukera ere egongo da, eta gura dutenek bazkaltzeko bonoak hartu ditzakete frontoian.
Gogoratu behar da, era berean, alde zaharrean berritze lan batzuk egiten ari direla Artekalen eta Beratza aldapan, baina abuztuaren 29rako amaituta egotea aurreikusten da.
Egitarauaren zehetasuna guztiak HEMEN