Gordexolako Udalak abiadura kontrolatzeko plastikozko konkorrak ordeztu egin ditu. Orain dela urte eta erdi sortutako arazoari konponbidea eman zaio. Hala ere, erabiltzaile batzuen esanetan, jarritako igarobide goratuetariko batzuk altuegiak dira.
Artziniegatik Bilbora doan BI-2604 errepidea amesgaiztoa izan da azken urte eta erdian Artziniegako herritarrentzat. Arazoa 2008. urtearen amaieran sortu zen, Bizkaiko Foru Aldundiak Gordexolako Udalari errepide horren kudeaketa esleitu ondoren. Orduan, udalak, “larregizko abiadura kontrolatzearren" plastikozko 20 konkor edo erresalto ipini zituen udalerria alderik alde zeharkatzen duen bidean, 8 kilometrotan zehar. Ezinegona eta kexak berehala etorri ziren Artziniegatik, asko direlako bide hori egunean-egunean lanera joateko edo bestelako zereginetarako erabiltzen duten artziniegarrak. Erabiltzaileak kexu ziren hainbat arrazoirengatik: konkor horiek oso kaltegarriak zirelako autoarentzat abiadura-muga errespetatu arren, arauditik kanpo zeudelako edota osasunean kalte eragiten zietelako pertsona batzuei. Horretaz gainera, kontuan hartu behar da errepide hori dela Artziniega Gurutzetako ospitalearekin lotzen duen bidea. Hori dela eta, herritarrek protesta ugari antolatu zuten 2009. urtean, bai Gordexolan bai Bizkaiko Aldundiaren aurrean. Araba zein Bizkaiko arduradun politikoekin ere bilerak eduki zituzten. Ez zen fruitu handirik eskuratu eta Artziniegako Udalak berak salaketa jarri zion Gordexolakoari epaitegietan. Gordexolako Udalak, bere aldetik, esaten zuen “egin beharreko lanak burutu ahala” konkorrak kenduko zituela eta bitartean beharrezkoak zirela konkorrak, errepidean "ezbehar kopuru" handia zegoelako.
Azkenik, eta ustekabean, uztailaren 26 eta 27an, plastikozko konkorren ordez zementuzko zebrabide goratuak ipini zituzten, batzuk altuera apalekoak eta beste batzuk goratuagoak. Artziniegako bizilagunak pozik agertu dira, protestetan bozeramaile lanetan ibilitako Javier Martinen esanetan “egun pare batean urte bi aldarrikatzen" ibili direna “burutu egin delako". Hala eta guztiz ere, Martinek esaten du “igarobideetako batzuk gehiegizko altuera” daukatela eta “bat, zehazki, arriskutsua” dela. Dena dela, uste du orain egoera “nahiko onargarria” dela, eta eskerrak eman gura izan dizkie “mobilizazioetan parte hartu zuten guztiei, gizarte-taldeei eta Artziniegako Udalari”