Konponketa eta egokitzapen batzuk egin behar zirela eta, irekiera asko atzeratu da.
Kroldegia oraindik itxita dago, otsaileko ziklogenesiak eragindako kalte handiak ez direlako konpondu
Ia hilabete igaro denean uda-denboraldiari hasiera eman zitzaionetik, azkenik zabaldu egin dituzte Artziniegako udal-igerilekuak. Izan ere, udaleko beharginak maiatza aldean denboraldirako prestaketa-lanak egitera joan zirenean, ikusi zuten konpondu beharrekoa uste baino gehiago zela, eta igerileku handiaren ertzean eta xurgatze sisteman egin behareko moldaketek luze joko zutela. Horrek guztiak, jakina, traba nabarmena sortu die erabiltzaileei, kontuan izanda, gainera, azken asteotan oso eguraldi beroa eta atsegina izan dugula.
Hau ez da izan, ostera, La Barcenako kirolgunean dagoen arazo bakarra, izan ere, Artziniegako kiroldegiak itxita jarraitzen du otsailaren 27ko ziklogenesiak eragin zituen kalteak ez direlako oraindik konpondu. Aseguru-etxeekin desadostasunak egon dira kalteak baloratzeko orduan eta, hori dela eta, sabaian eta leihoetan gertatutako triskantzak bere horretan segitzen du, eta kiroldegia zerbitzutik kanpo. Ematen du, dela dela, uda ostean konponketak hasi daitezkeela.