Bihar, uztailak 9, Artziniega Museoaren etengabeko erakusketan XX. mendeko ibilgailuen saila zabalduko da.
Artziniegako antzinako autobusari buruzko berbaldi batekin inauguratuko da erakusketa.
Artziniegako etnografia museoak berezitasunik badu, hura eguneratzeko eta berritzeko duen asmoa eta gaitasuna da. Sortu zenetik gure iragan hurbileko ohitura eta bizimoduari arreta berezia eman gura izan dio, eta denbora gutxian asko aldatu den gizarte baten lekuko bihurtu. Ildo eta helburu horri jarraituz, XX. mende hasierako eta erdialdeko ibilgailuei buruzko sail berezia inauguratuko da. Sail hori museoaren erakusketa finkoan txertatu eta bisitari guztientzat ikusgai egongo da bihartik aurrera. Erakusketaren elementurik garrantzitsuena auto eta motoentzako tailer baten erreprodukzioa izango da, non motoak, bizikletak zein motorren zatiak eta auto eta kamioien miniaturak erakutsiko diren.
Erakusketa inauguratzeko, Miguel Martin Zurimendik berbaldia eskainiko du bihar 20:00etan Artziniegako antzinako autobus-linearen gainean. Domekan, berriz, eguerdiko hamabietatik ordu bietara ibilgailu klasikoen erakustaldia eta kontzentrazioa egingo da museoko anfiteatroan eta ondoko aparkalekuan.