Asteburuan izandako ekitaldien ostean, gaur eta bihar bitartean Arabako patroiaren omenezko azken txanpa izango da. Aiarako jaiei amaiera emango zaie, eta gaur umearen eguna ospatuko da.
Bihar ospatuko da San Prudentzio Arabako patroiaren eguna eta gure eskualdean ez da horren inguruko ekitaldirik faltako. Asteburuan hainbat eta hainbat kontu izan dira inguruotan, tartean, jakina, Aiarako jaiak. Atzoko atseden txikitxoaren ostean gaur herritarrak atzera ere murgilduko dira jai-giroan. Gaurkoan danborrada eta umeen txanda dugu; izan ere, Amurrion "danborrada txikia" egingo da frontoian 15:30ean, udal musika-eskolaren eskutik, eta 20:00etan danborrada nagusia herriko kaleetatik. Amaitzeko, barraskilo-jana egingo da. Laudion ere ume eta nagusien danborradak egingo dira: 17:30ean herriko ikastetxeek antolatutako danborrada txikia egingo dute eta zortzietatik aurrera Rakataplak antolatzen dituen danborrada eta erretreta. Artziniegan, ostiralean ospatu zen umeen danborrada, Arte Gure Ama eskolak antolaturik.
Aiaran, ostera, asteazkenean, San Prudentzio egunean bertan egingo da danborrada txikia, gaur umeen eguna ospatu eta gero. Laudiori dagokionez, 28an kirola izango da protagonista, San Prudentzioko bolo-txapelketa jokatuko da-eta Lamuza parkean, eta amaitzeko XIV. idi-proba txapelketa, Berrio kirol elkartearen eskutik.