Aiarako San Prudentzioek zabalduko dute eskualdeko jaietako denboraldia. Ostiralean hasi eta San Prudentzio egunera arte ez da aspertzeko astirik egongo.
Heldu da udaberri bete-betea eta urtero lez Aiaraldeko jai-denboraldiaren lehenengo hitzordua bertan da: Aiarako san Prudentzioak. Tradizio handiko jai hauek ostiralean hasiko dira eta asteazkenera bitartean aiararren eta ingurukoen topaleku bihurtuko dira, gustu eta adin guztietarako egitarau zabal bat lagun dutela.
Jaiak, ohi lez, ostiral honetan hasiko dira 19:00etan Arespalditzako plazan botako den txupinazoarekin. Ondoren jaietako portada lehiaketaren sariak emango dira eta ordutik aurrera musika eta dantza izango dira protagonista ikastolako dantza-taldearekin, fanfarrearekin eta lekuko taldeen emanaldiarekin. Azkenik, Lisker talde mitikoarekin dantzaldia egongo da.
Larunbata “Gazteriaren Eguna” izango da, jendearen parte-hartzea ezinbestekoa den eguna; izan ere, goizez gastronomia lehiaketak egingo dira (bakailao eta tortillarenak), eta ordu bietan herri bazkaria. Ondoren euskal jolasak egongo dira. Gauez musikaren txanda etorriko da, "Maitips" eta "Trikizio" taldeen manaldiarekin. Asteburua amaitzeko adinekoen eguna ospatuko da domekan, eta eurentzako bazkari eta ekitaldiak izango dituzte. Baina ez hori bakarrik, kirolaz gozatzeko aukera ere egongo da jesus Isasiren oroimenezko txirrindulari-lasterketarekin eta pilota partiduekin.
Astelehenean atsedena hartuta, asteartean ekingo zaie atzera ere jai-ekitaldiei, eta umearen eguna izango denez, goizetik arratsaldera bitartean haur parkea, pailazoak, tailerrak eta beste hainbat kontuez disfrutatu ahal izango dute txikitxoek. Jaiei amaiera emateko, patroiaren eguna helduko da asteazkenean, San Prudentzio eguna; orduan umeen danborrada izango da ekitaldi nagusia.