Edu Villanueva peñako presidenteak adierazi duenez, aurreikuspen oso onak dituzte. Izan ere, egun hauek nahiko jendetsuak izaten dira eta, hortaz, giro ederra espero dute herrian hilaren 27rako. Iaz, esate baterako, 700 lagun elkartu ziren Medina de Pomarren ospatu zen jai-egunean. Aurten, berriz, gehiago espero dituzte, “are gehiago goizeko poteora edo kontzertuetara etorri daitezkeenak kontuan hartuta”, presidentearen esanetan. Artziniegara etorriko diren peñak batez ere Euskal Herrikoak izango direla gaineratu du Villanuevak, gehienak Bizkaikoak, bai eta hurbileko beste leku batzuetakoak, “Kantabria eta Burgosekoak, adibidez”. Athleticeko ordezkariak eta jokalariren bat bertaratzea espero dute antolatzaileek.
Programatu diren jarduerei dagokienez, goiz-goizetik hasiko dira ekitaldiak, Ganzorrotz taldeak mendi-ibilaldia antolatu duelako Artziniegako inguruetatik; 9:00etan abiatuko da frontoitik eta 10 km inguru izango ditu. Eguerdian emango zaio, dena dela, hasiera “ofiziala” egunari, banderaren jasotzearekin eta txupinarekin. Ondoren, triki-poteoa egingo da 15:00etan bazkaria hasi bitartean. Arratsaldean, ostera, herri kirolen erakustaldia egingo du Bizindar taldeak 18:00etan eta ondoren Bihar Lehoi Izango Da eta Urteko Lehoi Emea sariak banatuko dira. Umeentzako puzgarriak eta jarduerak egongo dira goizean eta arratsaldean.
Amaitzeko, musikaz beteko da herria, The Lowe Band, Akerbeltz, The last Beer eta The Bon Scott Band taldeen eskutik. Kontzertuak frontoi ondoko plazan egingo dira 19:00etatik gauerdira arte.
Polemika Alaveseko jarraitzaileekin
Sare sozialetan Alavés taldeko zenbait jarraitzailek adierazi dute ez daudela herriaren hautaketarekin, izan ere, Artziniegan -hau da, Araban- ospatuko dute jaia Gasteizko taldeak FC Barcelonaren aurka Kopako finala jokatzen duen bitartean.