Larunbat goizean Olatzagutia aldera. 3. postua23,5km 2 ordu 3 min.
Goiz ona eta egun perfektua korrika egiteko.
10.00etan hasi zen lasterketa eta lehenengo 5 km-ak gogorrak ziren, beraz lasaitasunez hartu nituen, normalean hasiera kostatzen zaidalako. Laguntza ezin hobea neukan Xabi Zalbide nirekin joan zelako. Txilen pasatako uda/neguak ez du atzean utzi eta beraz, niri itxaroten joaten da. Gero eta hobeto lasterketan zehar eta sentsazio onak indartsu amaitzeko.
Ohorea izan da niretzat pódiumean Maite Maiora eta Alizia Olazabalekin egotea. Eta lasterketako asistentzia betiko moduan oso ona, Ander eta ama, eta Txema, Xabiren aita.
Ondo amaitu nuenez, trofeoa hartu eta gero Mallabiara joan ginen hango mendi duatloia egiteko. Bizikleta kotxean neukan asmo horrekin nengoelako. Ez zegoen denbora askorik eta beraz kotxean bazkaldu nuen duatloia 16:00an zelako.
2. postua, 2h20min 6,8trail +16btt + 3,4 trail.
15:00etan heldu ginen, izena eman, arropa jantzi eta hastera.
Lehenengo zatian korrika bi itzuli eman behar ziren, aldapa gogorrekin. Goizekoa nabaritzen zen eta kostatu zitzaidan lasterketan sartzea, baina lehenengo kilometrotik aurrera aurreko bi neskak aurreratu nituen eta 2-3 minutu atera nizkien. Baina, bizikletarako aldaketa astiro egin nuen eta lehenengo itzulian Meritxell Henalesek aurreratu ninduen eta bigarrenean Laurak. Bizikletako zatia Urduñan baino gogorragoa egin zitzaidan eta bi aldiz jausi nintzen. BTT zatia amaituta Laurak 2 minutu lehenago hasi zen korrika, eta uste nuen ez nuela harrapatuko, baina azken kilometroan ikusi egin nuen eta azken indarrak agortuta 2 postuan sartzea lortu nuen. Poz handia.
Hurrengo egunean goizean Gorbeia Suzien lasterketa ikustera joan nintzen Zeanurira, ezagun eta lagun askok parte hartzen zutelako.
Eta arratsaldean Nafarroara berriro, oraingoan Igantzira, Euskal Herriko lokotx bilketa txapelketan parte hartzera. Txapeldunorde 7’40’’ denborarekin.
Beroketa ariketak egiten egungo txapelduna ikusten dut, Maika Aristegi (15 urte daramatza irabazten), eta argi dago lokotxak otzaran sartzen erraz asmatzen duela. Korrika ahalegin handia egin behar nuen. Hasi eta nik korrika hartzen nuen abantaila berak lokotxak jaurtitzen murrizten zuen. Batean huts egin zuen eta taktika aldatu zuen, aurretik atzera hartuz. Nahiko parean genbiltzan baina bi falta zitzaikidanean huts egin nuen eta 5 segundorengatik irabazi zidan. Pena handia, larunbateko lasterketetan baino ilusio handiagoa nuelako.
Gizonekoen txapelketa ere jokatu zen, eta Aritz Iturribarria 5. sailkatu zen. Urrunetik ondo jaurtitzen ikasi behar dugu!