Zabalik dago Aiarako Demola proiektuan izena emateko epea

Aiarako Demola proiektuaren helburua da Aiara Eskualdeko enpresek aurkezten dituzten erronka errealei aurre egitea. Hala, erronka horiek gainditzeko lanean, partaideek aukera izango dute euren gizarte- eta lanbide-gaitasunak garatzeko, berrikuntza irekiko proiektu baten bitartez lan-merkatuan kokatzeko, euren curriculuma aberasteko eta enpresekin harremanak eraikitzeko. Orain, azaroan, 4 hilabetez esperientzia berritzailea, erronkaz betea, diziplina askotakoa eta benetakoa izan nahi duten hautagaiak aukeratzen ari dira. Aiarako Demola Goi Mailako Lanbide Heziketako eta/edo unibertsitateko azken ikasturtea egiten ari diren ikasleentzat edo 2015etik aurrera ikasketa horiek bukatu dituztenentzat pentsatua dago. Proiektuan parte hartzen dutenek aukera izango dute zuzenean esku hartzeko enpresa baten beharrizanetan, euren gaitasunak eta talentua mobilizatuz eta enpresen erronkei irtenbideak emanez. Parte hartuko duten enpresak nekazaritzako elikagaien, ingeniaritzaren eta turismoaren sektorekoak dira, eta helburu hauek dituzte: azoketako eta sustapen-ekitaldietako presentzia hobetzea modu original batean, esperientzia paregabea eskaintzea bezero eta jarraitzaileei, bisitariei enpresaren kultura eta ezagutzak transmititzeko lokal bat egokituz, bezeroei aukera ematea informazio pertsonalizatu grafikoa eta geoerreferentziaduna izateko, sakelakoen edo tableten bidez eskuratzeko moduan aisialdi- eta heziketa-produktu edo -zerbitzu bat sortzea. Erronka edo helburuei buruzko informazio gehiagorako edo hauetan izena emateko Demola-ko plataforman egin behar da: http://basquecountry.demola.net/apply . Izena emateko epea azaroaren 22an itxiko da. Horretarako, denetariko profilak dituzten partaideak behar dira; esaterako, enpresen marketinaren edo kudeaketaren arlokoak, ekonomiakoak, zuzenbidekoak, soziologiakoak, hezkuntzakoak, arlo soziosanitariokoak, arte ederretakoak, turismokoak, ingeniaritzakoak, mekatronikakoak, informatikakoak… Izan ere, berrikuntza irekiko proiektuak izanik, zenbat eta profil gehiago eta askotarikoagoak egon, orduan eta aberasgarriagoa izango da berrikuntza-prozesua eta irtenbideak sortzekoa. Parte hartu nahi baduzu edo informazio gehiago lortu nahi baduzu, jar zaitez harremanetan Amurrio Bidean-ekin, 945891721 telefono-zenbakira deituta edo empresa@amurriobidean.org helbide elektronikora idatzita. Aiarako Demola berrikuntza irekiko proiektua Aiara Eskualdeak sustatzen du Demola Basque Country (http://basquecountry.demola.net/) erakundearen laguntzarekin, eta Arabako Foru Aldundiak laguntzen du diruz.