Urrian hasiko da Txertatu Merkatuan programa, baina jada eman daiteke izena. Kualifikazio baxua duten eta lanik gabe dauden 16 eta 30 urte bitarteko gazteentzat dago pentsatuta programa (informazio gehiago nahi izanez gero, kontrazalean begiratu).
Bestalde, irailaren 15etik aurrera izena eman ahal izango da honako ikastaro hauetan ere: “Biltegien kudeaketa eta orga jasotzaileen garraioa” eta “Kudeaketarako aplikazio informatikoak”. Bi ikastaroek 100 ordu iraungo dute, eta goizean emango dira, 09:00etatik 14:00etara, ReforAmurrio Enpresaldean.
Urriaren amaieran eta azaroaren hasieran beste bi ikastaro emango dira. Lehenengoa BIM (Building information modeling) - Revit metodologiari buruzkoa izango da; BIM, hain zuzen, eraikin edo azpiegitura baten ezaugarri fisiko eta funtzionalei buruzko informazio koordinatu, koherente eta konputagarriaren erabileran oinarritutako lan-metodologia da. Bigarren ikastaroa, berriz, Nazioarteko Merkataritzari buruzkoa da, eta enpresa baten nazioarteko harremanak kudeatzeko behar diren teknikak, tresnak eta gaitasunak ezagutzen eta garatzen laguntzea du helburu.
Bi ikastaroetan izena emateko epea urriaren 10ean hasiko da. Informazio gehiago jasotzeko eta izena emateko, jarri harremanetan Amurrio Bidean-ekin, 945891721 telefono-zenbakira deituta edo empresa@amurriobidean.org helbidera idatzita.