Amurrioko Udalak programa berri hori antolatu du Amurrio Bideanen bitartez. Urriaren 27an hasiko da, 2015eko martxoaren 12ra arte iraungo du, eta Reforamurrio Enpresaldeako instalazioetan egingo da. Helburua da parte-hartzaileekin lantzea ekintzaileei aurrez egozten zaizkien abileziak, konpetentziak eta gaitasunak; izan ere, oso baliagarriak dira, enpresetan jarduteko edota enpresa-ekimen berri bat gogoan baduzu. Team Academy metodologia erabiliko da. Finlandiako Jyväkylä Unibertsitateak sortu du, liderra baita Europan ekintzailetza-tasetan. AKTIVA-TEk talde-lana eta learning by doing (eginaren eginez ikastea) bateratuko ditu. Programak iraun bitartean, banaka, talde txikietan (proiektu-taldeak) eta taldeka ikasiko dute zenbait ekintza-motaren bidez: taldekako saioak (eduki teorikoak lantzea), elkarrizketa-saioak, jarraipena egiteko saioak, eta banaka zein taldeka lan egiteko tartea (252 ordu). Hartara, parte-hartzaileek hainbat gaitasun eta konpetentzia eskuratuko dituzte (taldeetako lidergoa, abilezia estrategikoak, autokudeaketa, proiektuak kudeatzea, etab.), eta balio bereizgarria emango diete lan-merkatuan. Orobat, tresna berriak erabiliko dira (learning contract, pre-post Motorola, etab.), ezarritako xedeak erdiestea errazteko. Programan zehar, parte-hartzaileek iradokitzen dituzten proiektuak landuko dira batik bat, udalerrian indartu nahi diren arloekin lotuta planteatzen zaizkien erronken aurrean; horrela jokatuz, jarduteko proposamenen berri eman ahal izango zaie. Asmoa da ezaugarri jakin batzuk dituzten pertsonei erantzutea: zerbait ezberdina egiteko gogoa badute, lan-egoera berpiztu nahi badute, esperientzia berrietara irekita badaude edo euren ingurua aldatu edo eraldatzeko prest badaude. Azken finean, “xedea da parte-hartzaileek oso gustuko dutena topatzea eta irtenbide profesional egokia identifikatu ahal izatea”. Hala, gehienez, 12 pertsonako talde bat osatuko da, eta parte hartu ahal izateko, goi-mailako ikasketak behar dira, gutxienez; bestela, horren baliokide izan daitekeen lan-eskarmentua egiaztatu behar da. Langabeek lehentasuna izango dute, baina lanean daudenentzat ere irekita egongo da, interes eta jakin-nahi hori badute. Berez, asmoa da gazteak eta pertsona zaharragoak elkartzea, taldea aberasgarria izateko eta guztiek gainerakoengandik ikasteko. Ikastaroaren matrikulak 32,63 € balio du. Izena eman edo informazio gehiago nahi dutenak harremanetan jar daitezke Amurrio Bideanekin, 945891721 telefono-zenbakira deituz edo autoempleo@amurriobidean.org e-postara idatziz.
Aktiva-te, eraldaketa bultzatzen duen ikasketa sortzailea, jakin-nahi handikoentzat edo ekintzaileentzat
2014ko urr. 2a, 12:03
LAGUN AGURGARRIA:
Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide