Urduñako udaleko ordezkari politikoek zein udal langileek, hiriko sektore publikoaren aldeko adierazpena aurkeztu zuten atzo Foru plazan eginiko prentsaurrekoan. Haiekin batera herritar ugari izan ziren, "Urduñak merezi du" herri plataforma osatzen duten kideak tartean.
Udalaren zorpetzea herritar guztien pairatzen dutela azpimarratu zuten eta herritargoak "kopuru zein kalitate aldetik, zerbitzu publiko duin eta egokiak" izateko eskubidea duela ohartarazi.
Udaleko "funtzionamendu gastuak eta herriak jasan behar duen presio fiskala, Bizkaian biztanle kopuru bera duten udalerrien pare" daudela gaineratu zuten. Hala ere "Urduñako arlo publikoak duen zorra beste udalerriena baino askoz handiagoa" dela deitoratu zuten agerraldian. Udalak azken urteotan hartutako nuerriek gastu arrunta miloi bat eurotan murriztea lortu badute ere, udalerriaren egoera zuzentzeko ez da nahikoa izan.
Egoera honen aurrean, "ardura duten instituzio guztien inplikazioa" eskatu zuten partaideek. Egoera zuzentzeko orduan argi utzi zuten irtenbidea ez dela zorra handitzea, ez eta "gizarte edo lan eskubide murrizketa gehiago ekarriko duen neurririk hartzea" ere.
[video:http://youtu.be/dVJAEsOE7d4]