Iragan astelehenean Bizkaiko Foru Aldundiko Presidentzia Ahaldun Unai Rementeriarekin bilera izan eta gero, Urduñako udalak foru erakundeak hiriko ondarea salgai jartzeko eskakizuna deitoratu du. Udalaren arabera, neurriak zorpetze maila arindu ez eta hiriko ondare historiko nagusia den Aduana eraikina salgai jartzera behartzeak ez ditu Urduñaren finantza arazoak konpontzen.
Udalak iragan urrian aurkeztu zuen udalerriaren egoera ekonomikoa zuzentzeko Plan Ekonomikoa; honen arabera, udalari zerga zein ohiko gastuen inguruko konpromisoak betetzea zegokion, eta Bizkaiko Aldundiak, bere aldetik, Urduñederra erakunde publikoan 2008 urteaz geroztik duen partaidetza handitzea proposatzen zuen, sozietate publiko horretara zuzendutako diru hori zuzenean zorra kitatzera bideratuz. Aldundiko agintariek ordea, udalaren plana baztertu zuten aukeztu eta gutxira.
Gauzak horrela, Aldundiak Urduñari hiriko ondare historiko nagusia salgai jartzea exigitzen dio, udalak neurri hau "ondare outlet" gisa izendatu du.
Urduñako udalak muga legal guztiak gainditzen dituen zorpetze maila bizi du, 2004 eta 2007 urteen artean egindako kreditu operazioak Bizkaiko Foru Aldundiaren oniritziarekin burutu ziren eta orduan foru erakundeak udaletxeen gainean duen tutoretza finantzieroari muzin egin zion, udalak zein Urduñederra sozietateak egindako mailegu operazioak foru arauen bitartez bermatu baitzituen.