Ikastetxeetako jantokiak tokian-tokiko elikagaiekin kudeatzeko eskatu dute eskola munduko hainbat eragilek sinatutako hitzarmen baten bidez; guztira 70 eragile eta 500 norbanakotik gora izan dira adierazpena izenpetu dutenak, tartean sindikatuak, kontsumitzaile elkarteak eta hainbat udal. Egitasmoa Urduñan abiarazitako udal-sukalde proiektutik sortu dela adierazi dute, hiriko eragile desberdinek udal sukaldea kudeatzeko egindako proposamenetik.
Manifestuak, eskola jantokiak kudeatzeko eredua aldatzeko eskatzen du irizpide "iraunkorragoei" tartea zabalduz; hori dela eta, datorren legegintzaldian egungo eredua zehazten duen dekretua aldatzeko eta kudeaketa zuzena gauzatu ahal izateko proposamen berria mahaigaineratuko dutela adierazten dute.
Bidalitako prentsa oharrean sinatzaileek azpimarratzen dute "kontsumo eta ekoizpen-irizpide arduratsuak oinarri dituzten eskola jantoki proiektuak babesten dituztela, tokian tokiko produktuak, sasoikoak eta ekologikoak baliatzen dituztenak". Hori dela eta Urduñan abiatutako udal sukalde proiektuari zein beste udalerritan bultzatutakoei babesa adierazten diete.