Ostegunean egindako osoko bilkuran Jose Maria Beascoechea PP alderdiko zinegotziak Bildu udal taldearekin biktimen inguruan eginiko adierazpen bateratuak ezustea sortu du alderdi popularreko arduradunen artean.
EFE agentziak jasotako adierazpenen arabera, Nerea Llanos, PP alderdiko Bizkaiko Idazkari Nagusiak, Urduñako zinegotzia “erabat oker” dagoela adierazi du eta adierazpena “egunkarien bitartez” ezagutu izana deitoratu du. Alderi popularrak Jose Maria Beascoecheari azalpenak eskatuko dizkiola gaineratu zuen herrialdeko idazkariak.
Polemika herenegun izandako osoko bilkuran eginiko adierazpen bateratuak piztu du, PP eta Bildu koalizioko ordezkariek “biktima guztien aitortza” edota “gatazka pairatu izan dutenen erreparazioa” aipatzen zituen testua onartu eta gero. EAJ alderdiak bere aldetik, proposamen alternatiboa aurkeztu zuen batzarrean, besteak beste ETAren disoluzioa eskatuz.
Udal bilkuran adostutako adierazpen instituzionalak duela hilabete batzuk PP zein Bildu alderdiek eginiko proposamen desberdinetan du oinarria; orduan alderdi popularrak Miguel Angel Blancoren heriotzaren urteurrenaren harira testua aurkeztu zuen, Bildu koalizioak bere aldetik Aieteko konferentziaren puntuekin osatutako testua garatu zuen. Adostasuna lortzeko asmoz, alde biek elkarrizketa abiatu zuten bakegintzaren inguruan jarrera komun minimo bat bilatzeko. Bilkuran onartutako adierazpena elkarren arteko lan luze eta isil horren emaitza izan da.