Azken urteetan lan baldintzek hirian izan duten bilakaerak kezkatuta, ELA eta LAB sindikatuek manifestazioa deitu dute apirilaren zortzirako; protestaren leloa "Urduña berpiztu langileon eskutik!" izango da eta Foru plazatik abiatuko da.
Sindikatu hauek argitaratutako oharraren arabera, "azken urteetan, lan postu mordoen galera ekarri zuten berregituraketen ondoren, Somolsak, Muebles Laok, eta Tranerrek (lehengo Gamak) itxi egin dute. Honela 90eko hamarkadatik hona 1.500 lan postu baino gehiago galdu dira". Langabeziak hirian izan duen bilakaeragatik ere euren kezka adierazi dute sindikatuok, baita sortzen diren lan postuak "baldintza prekarioagoetan" direlako.
“Administrazio publikoei industria sustatzeko eta enplegu duina sortzeko apustu sendoa egin dezaten galdetzen diegu, ez baitugu nahi Urduña lo egiteko baino balio ez duen hiria izatea" adierazten dute kaleratutako oharrean.
Manifestazio deialdiaz gain, prentsaurrekoa ere deitua dute ostegunerako, abiatutako kanpainaren berri sakonago emateko; aiaraldea.com-en ere horren berri izango duzue.