Enpresak, ateak itxi eta likidazioari ekiteko, langileak era mailakatuan kaleratzeko egutegia aurkeztu zuen urte hasieran. Egutegi horren arabera, langile guztien kaleratzea antolatzen da.
Enpresa ixteko lehen urrats gisa, astelehenean 40 bat behargin kaleratu zituzten, hortik aurrera batzuk luzaroagoan geratuko badira ere, hemendik eta otsailak 28ra arte denak kaleratuko dituzte lanetik, lau pertsona izan ezik, enpresa desmantelatu ahala.
Lantegiaren kudeatzaileek eginiko plangintzaren arabera, lau pertsona izango dira Tranerren itxiera amaierara arte gauzatuko dutenak, kide horiei (nagusi bat, erdi mailako kargu bi eta administratibo bat) urtebeteko lana emango zaie. Honek ondoeza eragin du kaleratutako langileen artean, izan ere geratuko direnek dirutza irabaziko dutela salatu baitute.
Era berean, langileak kexu agertu dira Enpresa Batzordeko LABeko kide guztiak eta ELAko gehienak izan baitira lehen kaleratuak, eta langile batek adierazi digun bezala “langileon ordezkariak kaleratu dituzte lehen neurri gisa, langileok enpresaren hartzekodunak garenean”; izan ere enpresak zenbait lansari zor dizkie beharginei.
Hilabete hasieratik, lantegiko materiala ateratzen ari dira, eta egun enpresak zituen trokelen % 10 inguru bakarrik geratzen da.