Atzo arratsaldean Urduñako Herri Ikastetxeko jantokia lepo ageri zen bertan izandako 41. Agroekologia Foroan. Guraso Elkarteko kideak ziren gehienak, baina bertan hiriko nekazari eta ekoizleak zein jakingura zuten hiritarrak ere ageri ziren.
Halako ikusminak bazuen arrazoi nagusi bat, Urduñako zentro guztiei zerbitzu bateratua emateko udal jantoki baten egitasmoaren inguruan hausnartu baitzen.
Ekoizpen Urduñako agroekologia zerbitzuak bultzaturik,hiriko garapenari eusteko asmoaren eta eskola jantokien autogestioaren inguruko eztabaida egin zen. Urduñako Herri Ikastetxeko jantokian bertako produktuak zabaldu eta formula autogestionatu batez kudeatzeko proposamena luzatu zen. Horrek hiriko zenbait sektoreren onurarako neurria suposatuko luke: bertako produktuen merkaturatzea, herriko ekoizle eta saltzaileei erostea, eta garaiko, hurbileko eta kalitatezko elikagaiak eskaintzea.
Aspaldi planteatutako egitasmoa dugu eta negoziaketa askoren ondoren, Eusko Jaurlaritzak, aldundiak eta udalak begi onez ikusten dute.
Urduñako Herri Ikastetxeak ez du sukalderik; bai, ordea, Nagusien Udal Egoitzak, eskolatik metro gutxira dagoelarik. Beraz, Urduñako zentro publiko guztientzako sukalde bateratu bat atontzea planteatu zen, eta handik aurrera elikagai ekologikoak apurka- apurka menuan sartu.
Bideragarritasun ekonomikoa aztertu zen inguruko beste esperientzietan oinarrituta eta gurasoentzako gainkargarik gabe horrelako jantokia aurrera eramatea posible dela egingarria dirudi.
Larrabetzun, aspaldi ari dira eskolako jantokia eredu autogestionatu batekin kudeatzen. Bertako kide bat, Julen, haien esperientziaren inguruan mintzatu zen. Guraso elkarteak antolatzen du jantokiko lana. Hasieran arazoak eta lan nekezak izan baziren ere, horrelako egitasmoak egingarriak direla ondorioztatu zen. Larrabetzun, egun, sukaldari bat, bi laguntzaile eta hamabi zaindari dituzte lanean. Bost asteko menuak antolatzen dituzte, modu ziklikoan; hornitzaileekin koordinatzen dute lan hori. Kalitateak nabarmen egin du gora eta herriaren onurarako izango da, bertako merkatari eta ekoizleei produktuak erosita.