Irailean hasi ziren Urduñako Familia Sakratua eliza konpontzeko lanak eta apurka-apurka eraikinak izango duen itxura antzematen hasia da aldamioak kendu ahala: etxaurreko harlandua garbi agertzen da, erliebeak eta kanpai-hormak konpondu eta osatu dituzte, eta abar. Gauzarik deigarriena, ordea, Bihotz Sakratuaren estatua kendu izana dugu.
XVII. mendeko eraikina izanik, bere jatorrian harmarria zizelkatua duen idulkia baino ez zuen eta horrela jarraitu zuen 265 urte luzetan zehar; izan ere, Bihotz Sakratuaren eskultura 1.945. urtean jarri zuten, frankismo garaian.
Konponketa lanek eraikinari jatorrizko itxura ematea dute helburu, hau dela eta eskultura kendu dute bat ez datorren elementua delako. PP alderdiak, ordea, Bihotz Sakratua kendu izanaren inguruko azalpenak eskatu zituen pasa den hilean Bizkaiko Batzar Nagusietan. Arturo Aldecoa PP-ko batzarkidearen hitzetan "hiriaren irudi eta sinboloetako bat" da.
Garrantzi artistiko eta historiko handiko tenplua
Perun bizi zen Juan de Urdanegui kapitaina eta Constanza Luxan, bere emaztea, izan ziren Familia Sakratuaren eta jesuitentzako ikastetxearen eraikuntzaren bultzatzaileak. Elizan bertan gordetzen dira bikotearen erretratuak eta beren erlikiak dauzkaten kutxak.
Santiago Raonek diseinatu zuen 1.680. urtean. Familia Sakratua Bizkaiko lehen eliza barroko apaindua dugu, eta, horregatik, garrantzi handiko obra da..
Tenpluaren eraikuntzak nabarmen aldatu zuen Urduñako hirigintzaren morfologia eta Erdi Aroko Erlojuko dorre zaharraren behin betiko eraisketa eragin zuen, beste ekintza batzuen artean. Dorre hori Harategi kalearen eta plaza beraren arteko kantoian zegoen, eta Urduñako jatorrizko harresiaren aztarnetako bat zen, udaletxeko dorrearen antzera. Dorreak 1.550 urtean bertan ezarritako erlojuaren izena hartu zuen.
Handik gertu, Harategi kale aldean eta Erdi Aroko hesi zaharraren harresia aprobetxatuz, Euskadin ezagutzen diren frontoi zaharrenetako bat egon zen, 1.674. urteko udal agirietan aipatzen baita.